Guverinoma y’u Rwanda yashimiye Umuyobozi wa Polisi y’Umujyi wa Paris, Laurent Nuñez-Belda wafashe icyemezo cyo guhagarika igitaramo cy’umuhanzi Maître Gims cyari giteganyijwe ku wa 7 Mata 2025 mu rwego rwo gupfobya Umunsi Mpuzamahanga wahariwe kuzirikana Jenoside yakorewe Abatutsi mu 1994.
Iki cyemezo cyafashwe nyuma y’uko icyo gitaramo cyagaragaye nk’icyabangamira ituze rya rubanda ndetse kigakoreshwa mu gukwirakwiza urwango n’ipfobya rya Jenoside yakorewe Abatutsi mu 1994.
Minisitiri w’Ububanyi n’Amahanga w’u Rwanda, Amb. Olivier Nduhungirehe, yashimiye uyu muyobozi wa polisi agaragaza ko icyemezo cye ari intambwe ikomeye mu kurwanya ingengabitekerezo ya Jenoside n’ivangura rikomeje kwimakazwa muri Repubulika Iharanira Demokarasi ya Congo (RDC).
Igitaramo cya Maître Gims cyari cyateje impagarara nyuma y’uko uyu muhanzi ashinjwaga gukwirakwiza amagambo y’urwango ndetse no gupfobya Jenoside yakorewe Abatutsi.
Ubuyobozi bw’Umujyi wa Paris n’imiryango iharanira inyungu z’abarokotse Jenoside bari basabye ko gisubikwa, ndetse na Ambasaderi w’u Rwanda mu Bufaransa na we yari yakigaragaje nk’igikorwa kibangamiye ukwibuka ku nshuro ya 31 Jenoside yakorewe Abatutsi.
Iki cyemezo cyo kugihagarika cyashimwe cyane n’abayobozi batandukanye n’imiryango iharanira inyungu z’abarokotse Jenoside, bavuga ko ari intambwe mu kurwanya ipfobya n’urwango rukomeje kwigaragaza mu karere.
