Umufaransa ufite inkomoko muri Congo-Brazzavile, Christopher Maboulou wakiniye amakipe atandukanye yiganjemo ayo mu gihugu cy’Ubufaransa, yitabye Imana ejo ku Cyumweru aguye mu kibuga.
Ibinyamakuru byo mu Bufaransa byavuze ko uyu mukinnyi wakinaga hagati mu kibuga yazize indwara y’umutima.
Ikipe ya Bastia Maboulou yakiniye yemeje amakuru y’urupfu rwe mu butumwa yanditse kuri Twitter yayo.
Christopher Maboulou yanyuze mu makipe atandukanye yo mu Bufaransa nka Châteauroux yo mu kiciro cya kabiri yakiniye hagati ya 2009 na 2014, Bastia yakiniye imikino 29 ya shampiyona y’ikiciro cya mbere y’Abafaransa hagati ya 2014 na 2016 cyo kimwe na AS Nancy yakiniye hagati ya 2018 na 2019.
Ikinyamakuru l’équipe mu nkuru gikesha le quotidien Ouest-France, cyavuze ko nyakwigendera Maboulou yafatiwe n’umutima mu kibuga, ubwo yari mu mukino yari yahuriyemo n’incuti ze mu mujyi wa Montfermeil avukamo.
Maboulou wakinnye imikino 58 muri shampiyona y’ikiciro cya kabiri na 29 y’Ikiciro cya mbere mu Bufaransa, yigaragaje cyane muri Bastia ubwo yatsinda ibitego bibiri mu mukino yanganyijemo na Olympique de Marseille ibitego 3-3 muri Kanama 2014. Icyo gihe yari afite imyaka 24 y’amavuko.
Muri 2015 yaje kugira imvune ikomeye bituma adatsinda ibitego yari yitezweho mu kipe ya Corsican yakiniraga, bituma ayivamo mu mwaka wa 2016/17 yerekeza muri PAS Giannina yo mu Bugereki.
Maboulou yagarutse mu Bufaransa mu mwaka w’imikino wa 2018/19 asinyira AS Nancy, ayivamo yerekeza mu kipe ya Thonon-Evian yo mu kiciro cya gatatu yakiniye imikino ibiri mbere y’uko imikino ihagarikwa kubera icyorezo cya COVID-19.
