Minisitiri w’Ububanyi n’Amahanga w’Ubuhinde, Subrahmanyan Jaishankar, yatangaje ko igihugu cye cyongereye abasirikare benshi ku mupaka n’Ubushinwa ku rugero rutari bwigere rubaho.
Jaishankar yavuze ko Ubuhindi budashobora kwemera ko Ubushinwa “buhindura uko bwishakiye” uko ibintu bimeze ku mupaka nk’uko CNN yabitangaje. Ibi Jaishankar yabigarutseho ubwo yasubizaga uwari umubajije kuri iyi ngingo mu birori byateguwe na kompanyi y’itangazamakuru , India Today. Ati: ” Uyu munsi Igisirikare cy’Ubuhinde cyohereje ingabo zitigeze zoherezwa ku mupaka n’Ubushinwa. Igisirikare kigiye kubuza Ubushinwa kuba bwahindura uburyo umupaka ucunzwe.” Uyu mudipolomate avuze ibi nyuma y’iminsi mike ingabo z’Ubuhinde n’iz’Ubushinwa zikozanyijeho mu karere ko ku mupaka gateje impaka mu ntara ya Arunachal Pradesh. Ubuhinde buvuga ko byose byatangiye ubwo abasirikare b’Ubushinwa bavogeraga ubutaka bwabwo. Ububanyi n’Amahanga bw’Ubushinwa bwo buvuga ko buzi neza ko ku mupaka n’Ubuhinde, ” ibintu bimeze neza kandi iki kibazo kiri kuganirwaho.” Ubushinwa ntacyo burishura ku byatangajwe na Jaishankar. Ubuhinde n’Ubushinwa basangiye agace k’umupaka karangwa n’umwiryane kangana na 3.440km. Aka gace kazwi nka Line of Actual Control cyangwa LAC.
Ubuhinde bwashyize abasirikare benshi ku mupaka n’Ubushinwa ku kigero kitigeze kubaho mbere
Sangiza iyi nkuru
Soma Izindi Nkuru
