Urukiko rw’Ikirenga rw’u Burundi rwagumishijeho ibihano rwari rwarahaye Gen Alain-Guillaume Bunyoni, nyuma yo kujuririra ibihano rwari rwaramuhaye mu mpera z’umwaka ushize.
Uru rukiko mu mwanzuro w’ubujurire bwa Bunyoni rwasomye rwategetse ko igifungo cya burundu Bunyoni yakatiwe mu Ukuboza umwaka ushize kigumaho, ikindi akamburwa imitungo ye yose ndetse akanatanga ihazabu ya miliyari 22.713 z’amafaranga y’Amarundi.
Ni Bunyoni wahamijwe ibyaha bitandukanye birimo gushaka kwivugana Perezida Evariste Ndayishimiye ndetse no kunyereza umutungo w’igihugu.
Uru rukiko kandi rwagumishijeho ibihano rwari rwarahawe Col. Désiré Uwamahoro, Samuel Destin Bapfumukeko na Côme Niyonsaba bareganwaga na Bunyoni.
Urukiko mu mwanzuro warwo rwavuze ko rwasuzumye ubujurire bw’aba bagabo rugasanga “nta shingiro bufite”.
