Amakipe ya Manchester City ya Olympique Lyonnais yo mu Bufaransa, yakatishije itike ya 1/4 cy’irangiza cya UEFA Champions league, nyuma y’uko Manchester City isezereye Real Madrid na ho Olympique Lyonnais igasezerera Juventus.
Real Madrid y’umutoza Zinedine Zidane yari yasuye Manchester City ku kibuga cyayo El Etihad, mu mukino yasabwaga gutsindamo ibitego biri hejuru ya bibiri kugira ngo igere muri 1/4 cy’irangiza.
Ni nyuma yo gutsindwa ibitego 2-1 mu mukino ubanza wabereye i Santiago Bernabeu muri Gashyantare uyu mwaka.
Ibitego 2-1 Manchester City yatsinze Real Madrid byari bihagije kugira ngo iyisezerere ku giteranyo cy’ibitego 4-2.
Ni ibitego byombi Man City yatsinze yungukira ku makosa ya myugariro Rafael Varane.
Icya mbere cyo ku munota wa cyenda w’umukino Gabriel Jesus yamburiye Varane umupira mu rubuga rw’amahina awuhaye Raheem Sterling awutereka mu ncundura, icya kabiri cyo ku munota wa 68 na bwo Varane yashatse guha umupira Thibaut Courtois n’umutwe, birangira uyu muzamu ukomoka mu Bubiligi umupira awutanzwe na Gabriel Jesus wahise awushyira mu izamu.
Umufaransa Karim Benzema yari yatsindiye Real Madrid impozamarira ku munota wa 28, ku mupira yari ahawe na Rodrygo.
Real Madrid yakinnye uyu mukino idafite Kapiteni wayo Sergio Ramos wari weretswe ikarita itukura mu mukino ubanza.
Ku rundi ruhande Juventus yatsinze Olympique Lyonnais ibitego 2-1, gusa ntibyari bihagije kugira ngo iyi kipe y’umutoza Maurizio Sari ikomeze bijyanye n’uko umukino ubanza wari wabereye mu Bufaransa yawutsinzwemo igitego 1-0.
Juventus yatsindiwe ibitego byombi na Cristiano Ronaldo, yanganyaga na Lyon igiteranyo cy’ibitego 2-2, gusa Lyon ifashwa no kuba yaratsindiye ibitego byinshi hanze y’ikibuga cyayo.
Amakipe abiri yiyongera kuri atandatu amaze kugera muri 1/4 cya UEFA Champions league, aramenyekana kuri uyu wa gatandatu FC Barcelona yakira Napoli yo mu Butaliyani, mu gihe Bayern Munich igomba kwisobanura na Chelsea.
