Polisi ya Uganda kuri uyu wa 27 Gicurasi 2020 yirukanye abantu benshi bari bagiye gushyingura Jimmy Kirunda wabaye Kapiteni w’ikipe y’igihugu y’umupira w’amaguru, yifashishije ibyuka biryana mu maso, ibaziza kutubahiriza ibwiriza ryo gukumira ikwirakwira rya Covid-19.
Jimmy Kirunda wari ufite imyaka 70 y’amavuko yapfuye tariki ya 25 Gicurasi. Yabaye Kapiteni w’Imisambi ya Uganda mu gihe kingana n’imyaka 10, ayifasha kujya mu irushanwa ry’ibihugu ry’Afurika mu 1974, 1976 no mu 1978. Yafashije iyi kipe kandi gutwara ibikombe by’irushanwa ry’Afurika y’Iburasirazuba inshuro eshanu (hagati y’1969 n’1977).
Ni uko yigaruriye imitima y’Abagande benshi. Umuhango wo kumushyingura, wabereye mu gace ka Bulesa muri Kyadondo gusa abantu birengagije ibwiriza ryatanzwe na Perezida Museveni, polisi ibasubiza inyuma, hasigara bake bemejwe muri iki gihe cya Covid-19.
Uganda imaze iminsi ibonekamo imibare y’abantu banduye Covid-19 iri hejuru kurusha iyo mu bihe byatambutse. Tariki ya 26 na 27 Gicurasi, hamaze kuboneka abantu 59 banduye. Igiteranyo cy’abamaze kugaragaraho Covid-19 muri iki gihugu ni 281, abamaze gukira ni 69.
