Inzego zishinzwe umutekano muri Uganda zatangiye guhiga bukware abakinnyi b’abakobwa batanu bahagarariye Eritrea mu irushanwa ry’akarere ka CECAFA ry’umupira w’amaguru w’abatarengeje imyaka 20 batorotse.
Aba bakinnyi bari bacumbitse muri hoteli iri mu Karere ka Jinja batorotse mu rukerera rwo kuri uyu wa 2 Ugushyingo 2021, basize bagenzi babo bagera kuri 13.
Iyi mpuzamashyirahamwe, CECAFA, yemeje aya makuru iti: “Abakinnyi batanu ba Eritrea mu gitondo batorotse hoteli muri Jinja, Uganda. Iki kibazo cyagejeje kuri Polisi, iperereza rirakomeje.”
Umuvugizi wa Polisi mu karere ka Kiira gaherereyemo Jinja, James Mubi yavuze ko abatorotse ari: Yisehaq Liwam Solomon w’imyaka 16, Mohammed Yordanos Abraham w’imyaka 17, Raka Shamat Futsum w’imyaka 18, Kahsay Rahel Michael w’imyaka 18 na Knfu Trhas Hebate w’imyaka 19.
Bikekwa ko baba badashaka gusubira iwabo, bashaka ubuhungiro muri Uganda, ariko ishami ry’Umuryango w’Abibumbye rishinzwe kwita ku mpunzi, UNHCR hamwe n’iki gihugu cyari kibacyumbikiye, byemeza ko batigeze babibisaba.
Andi makuru avuga ko aba bakobwa baba bagiye gusura abakomoka iwabo biganje mu mujyi wa Jinja, cyangwa bakaba bagiye muri Kampala.
Aba bakinnyi bo muri Eritrea biyongereye ku bandi 14 batorotse ubwo bari bitabiriye iri rushanwa muri Uganda mu 2012 no ku bandi bajya batoroka iyo baserukiye igihugu mu mahanga.
