Umunyapolitiki utavuga rumwe n’ubutegetsi bwa Uganda, Robert Kyagulanyi wamenyekanye mu muziki nka Bobi Wine, kuri ubu yagaragaje izina ry’ishyaka rye rishya azahagararira mu matora y’Umukuru w’Igihugu ateganyijwe muri Gashyantare 2021.
Bivuye mu bwumvikane hagati y’ishyaka People Power Movement(PPM) rya Bobi wine n’ishyaka National Unity Platform (NUP) ry’uwahoze ari Visi perezida wa Uganda ku butegetsi bwa Milton Obote , Moses Nkonge Kibalama bemeye guhuza imbaraga batora Bobi Wine nk’ugomba kubahagararira mu matora y’Umukuru w’Igihugu. Ni mu nama y’ihuriro ry’imitwe yombi yateraniye i Kampala ku munsi w’ejo.
Mu ijambo Kyagulanyi yagejeje ku bayoboke b’impande zombi, yavuze ko bemeye guhuza imbaraga n’ishyaka NUP hagamijwe kongera imbara mu guhangana na Perezida Museveni umaze imyaka isaga 34 ku butegetsi.
Yagize ati: “People Power yacu izakomeza gufungura imiryango kuri buri wese ushaka impinduka mu buyobozi no gukura Perezida Museveni ku butegetsi”
Ikirango gishya cy’iyi mpuzamashyaka Bobi wine azahagararira mu matora ni umutaka w’umweru n’umutuku uzengurutswe n’uruziga. Asobanura iki kirango Bobi Wine yavuze ko ari ubwugamo bwo kwihishamo ababatega imitego yose mu myiteguro y’amatora y’umwaka utaha.
Ibi bibaye nyuma y’iminsi itagera kuri 2 , Museveni aciye amarenga ko aziyamamaza mu matora yo mu mwaka utaha muri manda ya 5.
Mu butumwa yahaye itangazamakuru, umuyobozi wa NUP, Moses Nkonge Kibalama yavuze ko mu mpamvu zatumye yiyemeza kutavuga rumwe n’ubutegetsi hari n’iz’uko Museveni yahemukiye inshuti ye Obote amuhirika ku butegetsi. Kibalama akomeza avuga ko n’ubwo Museveni yavanye kubutegetsi Obote akoresheje igitugu, bo bazakoresha Demokarasi mu kumukura ku butegetsi yafashe nk’akarima ke.
Ishyaka NUP ryemewe nk’umutwe wa politiki mu mwaka 2004, aho umuyobozi waryo Moses Kibalama yaryandikishije nka National Unity, Reconciliation and Development Party (NURP). Mu mwaka 2017, inteko nkuru y’ubuyobozi yemeje ko iri zina rigomaba guhinduka rikaba rigufi, maze abagize inama y’ubuyobozi bemeza ko rigomba kwitwa National Unity Platform(NUP).
Robert Kyagulanyi wari usanzwe ari umuririmbyi w’injyana ya Reggae yinjiye mu muri politiki ku mugaragaro mu mwaka 2017, aho yatorewe guhagararira akarere ka Kyadondo mu nteko ishingamategeko ya Uganda nk’umukandida wigenga.
Amatora y’Umukuru w’Igihugu muri Uganda ateganyijwe muri Gashyantare 2021. Ni amatora agiye kuba mu gihe amatora yabanje, yose yegukanwe n’ishyaka National Resistance Movement(NRM) riyobowe na Perezida Museveni.
