Uganda yasabye u Rwanda kutihutira guhitana ubuzima bw’abantu

Ku wa mbere w’icyumweru gishize ni bwo abashinzwe umutekano b’u Rwanda barashe Muhereza ukomoka ahitwa Kahogo ho mu karere ka Kabale, nyuma yo kwinjiza magendu y’ibibiriti mu Rwanda, abashinzwe umutekano bamufata akabarwanya akoresheje icumu n’umupanga yari afite.

Mu muhango wo kumushyikiriza Uganda wabaye ku gicamunsi cyo kuri uyu wa mbere, u Rwanda rwari ruhagarariwe n’umuyobozi w’akarere ka Burera, Uwanyirigira Marie Chantal, mu gihe Uganda yari ihagarariwe na Darius Nandinda, umuyobozi w’abaturage b’akarere ka Kabale n’abandi bayobozi.

Umuyobozi w’akarere ka Burera yasobanuye ko mbere y’uko Muhereza araswa, Polisi yagerageje kumuta muri yombi akayirwanya akoresheje umupanga yari afite.

Ati”Ni amahirwe make kuba biriya byose byarabaye, ariko ndasaba Abagande buri gihe gukoresha inzira zemewe zitari iza panya.”

Patrick Besigye Keihwa uri mu bayobozi ba Kabale bitabiriye uriya muhango, yahamagariye abayobozi b’u Rwanda kutihutira guhitana ubuzima bw’abantu, ahubwo bakagerageza kubata muri yombi, igihe batekereza ko bakosheje.

Yagize ati”Turi abavandimwe; tugomba guhagarika ibi. Niba Umugande yakoreye icyaha mu gihugu cyawe, mute muri yombi umujyane mu butabera.”

Muhereza uheruka kuraswa, ni Umugande wa gatanu urasiwe mu Rwanda agerageza kuhinjiza ibicuruzwa mu buryo bwa magendu kuva muri Gashyantare umwaka ushize.

Nko mu ijoro ry’itariki ya 9 ishyira iya 10 Ugushyingo umwaka ushize, hari abaturage babiri ba Uganda barasiwe ku butaka bw’u Rwanda mu karere ka Nyagatare ubwo bageragezaga kwinjiza magendu, bahagarikwa na Polisi bagashaka kuyirwanya.

Ubuyobozi bwavuze ko Polisi y’u Rwanda yabanje guhagarika abo baturage bari bazanye magendu mu Rwanda banayicishije mu nzira zitemewe bagashaka kuyirwanya, mu rwego rwo kwitabara irarasa hapfamo babiri abandi basubira inyuma ku butaka bwa Uganda.