Ukraine yagabye igitero gikomeye cya drone ku ruganda rw’igisirikare mu mujyi wa Izhevsk, mu Burusiya hagati ahari intera irenga 1,000 km uvuye ku mupaka wa Ukraine.
Uru ruganda ruzwi nka Kupol Electromechanical Plant rukora ibikoresho birimo Tor missiles, radars, n’imbunda zirinda indege.
Igitero cyahitanye abantu batatu, abandi 45 barakomereka, harimo batandatu barembye, nk’uko byatangajwe n’ubuyobozi bw’intara ya Udmurtia.
Amashusho yashyizwe ku mbuga nkoranyambaga yerekanye ibisasu biturika hejuru y’inyubako y’uruganda, hagakurikiraho umwotsi mwinshi.
Uruhande rwa Ukraine rwatangaje ko drones ebyiri z’Urwego rw’Umutekano (SBU) zaturutse kure (km 1,300) zikagera ku ruganda, zigamije kugabanya ubushobozi bw’inganda z’intambara no kwerekana ko nta hantu na hamwe mu Burusiya hizewe ku bikorwaremezo by’igisirikare.
Ni ubwa kabiri uru ruganda rugabwaho igitero kuva mu Ugushyingo, ariko igitero cya mbere nticyari cyahitanye ubuzima.
Mu gihe Ukraine yagabaga icyo gitero, Russia nayo yohereje ibisasu byinshi: mu mpera z’icyumweru gishize, yagabye ibitero 537 kuri Ukraine, harimo i Kyiv na Lviv.
