Kuri uyu wa Kane, tariki ya 21 Ugushyingo 2024, umugore muremure kurusha abandi ku isi, Rumeysa Gelgi, n’umugufi kurusha abandi ku Isi, Jyoti Amge, bahuye ku nshuro ya mbere mu birori by’itangwa ry’ibihembo bya Guinness World Records.
Rumeysa Gelgi, umushakashatsi akaba n’umunyamategeko wo mu gihugu cya Turukiya, afite uburebure bwa metero 2.31, naho Jyoti Amge, umukinnyi wa filime wo mu Buhinde, afite uburebure bwa metero 0.79 ni ukuvuga santimetero 79. Iyi nkuru yaje gushyirwa hanze mu mashusho yasohowe na BBC, aho abatuye Isi bose bashimye uko aba bagore babashije guhura kandi bakagirana ibihe byiza.
Mu mashusho, Gelgi, umugore muremure kurusha abandi ku Isi, yasuhuje Amge n’umunezero, ati: “Muraho, amakuru yawe?” Amge, aramwenyura, asubije ati: “Byari byiza guhura n’umugore muremure kurusha abandi ku Isi ku nshuro ya mbere. Afite umutima mwiza, numvise nishimye kumubona.”
Aba bagore bombi bakomeje kuganira mu buryo bworoshye, basangira ikawa mu gihe baganiraga ku buzima bwabo, bari kwishimira gusangira ibihe byiza. “Twembi dukunda kwita ku buzima bwacu, kwisiga amavuta, kwisiga ibirungo by’ubwiza,” byavuzwe na Gelgi, ashimangira ko bahuje byinshi. Yongeyeho ati: “Uri mwiza cyane,” maze Amge asubiza ati: “Murakoze, nawe urasa neza.”
Uyu muhuro wahurije hamwe iki gitekerezo cyo kwizihiza umwihariko w’abantu batandukanye ku Isi, aho aba bagore bombi bahawe igikombe cy’ubwiza n’icyubahiro ndetse banandikwa mu gitabo cya Guinness World Records.
Gelgi yamenyekanye ku Isi ubwo yabaga umugore muremure cyane ku Isi afite imyaka 17, kandi yemejwe nk’umugore muremure cyane muri 2021. Naho Amge, yahawe izina ry’umugore mugufi ku Isi muri 2011. 
