Umuririmbyi w’Umunya-Australiya, Sia yatandukanye n’umugabo we Daniel Bernad nyuma y’imyaka ibiri bari bamaze babana nk’umugore n’umugabo.
Amakuru atangazwa n’ikinyamakuru PEOPLE avuga ko impapuro zisaba gatanya zatanzwe ku wa Gatatu, tariki ya 19 Werurwe 2025 aho Sia yatangaje ko batandukanye ku wa Kabiri, tariki ya 18 Werurwe 2025.
Nk’uko bigaragara mu nyandiko zo mu rukiko, Sia w’imyaka 49 y’amavuko yatangaje ko impamvu yo gutandukana ari “kutumvikana kudashobora gukemuka.”
Muri izi nyandiko, hanagaragajwe ko uyu muhanzikazi yabyaye umwana we wa gatatu, ari na we wa mbere yabyaranye na Bernad gusa uyu mwana yagizwe ibanga rikomeye.
Uyu mwana, witwa Somersault Wonder Bernad yavutse ku itariki ya 27 Werurwe 2024 bivuze ko amaze amezi 11 avutse nk’uko bigaragara muri iyo nyandiko ya gatanya.
Sia yasabye urukiko guhabwa uburenganzira busesuye ku mwana we yaba mu bijyanye n’uburere bwe ndetse no mu buryo bw’amategeko. Gusa, yemeye ko Bernad ashobora kubona uburenganzira bwo gusura uyu mwana.
Yongeyeho ko atifuza ko urukiko rwategeka ko agomba gutanga amafaranga yo gutunga Bernad nyuma yo gutandukana kwabo.
Sia na Bernad basezeranye byemewe n’amategeko mu mwaka wa 2023 ariko ubukwe bwabo bwabaye mu buryo bw’ibanga. Muri Gicurasi 2023, bombi barushinze mu muhango muto, wakorewe muri Villa Olivetta inzu y’ubugeni ya Domenico Dolce na Stefano Gabbana, iherereye mu mujyi wa Portofino mu Butaliyani. Ni ubukwe bwitabiriwe n’abashyitsi batandatu gusa.
Mbere yo gushyingiranwa na Bernad, Sia yari yarashakanye na Erik Anders Lang bakaba barasezeranye muri Kanama 2014 nyuma y’uko Lang yari yatangaje ko basezeranye mu kwezi kwa Kamena k’uwo mwaka. Gusa, mu Ukuboza 2016, urukundo rwabo rwarangiriye mu gutandukana.
