Umukinnyi w’umupira w’amaguru, Maicon Adeyemi Adewale Oluyide ukomoka mu karere ka Ilesa West muri Leta ya Osun muri Nigeria, yapfuye aguye mu kibuga ubwo yari mu irushanwa ryo kwibuka Otunba Isiaka Adetunji Adeleke.
Uyu mukinnyi wari ufite imyaka 29 yaguye mu kibuga mu mukino wa nyuma w’iri rushanwa wabereye ku kibuga cya Ataoja School of Science ku wa Kane, tariki ya 16 Mutarama 2025.
Umuvugizi wa Polisi ya Leta ya Osun, Yemisi Opalola yemeje aya makuru mu itangazo ryashyizwe ahagaragara ku wa Kane.
Yagize ati: “Uyu munsi (kuwa Kane), mu mukino wa nyuma w’irushanwa rya Adeleke Memorial Cup, wabereye kuri Ataoja School of Science, umukinnyi witwa Adeyemi Adewale, w’imyaka 29 ukinira ikipe ya Ilesa West, yaguye mu kibuga. Yahise ajyanwa mu bitaro bya Osun State University Teaching Hospital, aho umuganga yemeje ko yapfuye.”
Nyuma y’aho urupfu rw’uyu mukinnyi rutangajwe, Polisi yatangaje ko hatangiye iperereza ku cyaba cyateye iyi mpanuka y’urupfu.
