Umupolisi witwa James Mukhwana ukekwaho kwica impirimbanyi y’uburenganzira bw’ikiremwa muntu, Albert Ojwang wapfiriye muri kasho ya Polisi azize gukubitwa, yatawe muri yombi.
Kuri uyu wa 12 Kamena, ni bwo Polisi ya Kenya yatangaje ko yataye muri yombi uriya mupolisi.
Itangazo yasohoye rivuga ko “James Mukhwana wo kuri sitasiyo ya Polisi Nkuru ya Nairobi yatawe muri yombi kuri uyu wa 12 Kamena 2025, aho ukekwa afungiye kuri sitasiyo ya Polisi ya Capitol Hill n’abapolisi. Aregwa icyaha cy’ubwicanyi.”
Albert Ojwang, yatawe muri yombi tariki ya 7 Kamena 2025, ubwo Polisi yamushinjaga kuyiharabika akoresheje imbuga nkoranyambaga.
Nyuma y’amasaha make atawe muri yombi, Polisi yatangaje ko yishwe n’ibikomere yatewe no gukubita umutwe ku rukuta rwo muri kasho, gusa ibizamini byo kwa muganga byagaragaje ko yishwe n’inkoni yakubiswe n’abapolisi.
Perezida William Ruto ku wa 11 Kamena 2025, yatangaje ko yashenguwe n’urupfu rw’iriya mpirimbanyi.
Ati: “Nk’abanya-Kenya benshi kandi by’umwihariko nk’umubyeyi, nakiranye inkuru y’urupfu rwa Albert Ojwang n’umubabaro mwinshi.”
Ruto yagaragaje ko bidakwiye ko abantu bapfira mu maboko ya Polisi, yibutsa abapolisi ko mu gihe bafunze umuntu, baba bakwiye kubungabunga umutekano n’imibereho myiza ye.
Urupfu rwa Ojwang rwarakaje Abanyakenya, bajya mu myigaragambyo yamagana imikorere ya Polisi, banasaba ko abamwishe bakurikiranwa.
