Kuri uyu wa Mbere,itariki 8 Mutarama 2024, Abadepite bagize Komisiyo ya Politiki, Uburinganire n’Ubwuzuzanye bw’Abagabo n’Abagore mu Iterambere ry’Igihugu bakiriye Umuvunyi Mukuru Nirere Madeleine mu rwego rwo gutangira gusuzuma raporo y’ibikorwa by’Urwego rw’Umuvunyi by’umwaka wa 2022-2023.
Mu kiganiro Nirere Madeleine yagiranye n’Abadepite yabahaye ibisobanuro by’inyongera ku bikubiye muri raporo mu gihe Komisiyo yitegura kuganira n’Inzego bireba, ku bibazo byagaragajwe muri raporo.
Yagaragaje ko kuba ibibazo by’abaturage Urwego rw’umuvunyi rwakira byariyongereye, ku ruhande rumwe biterwa n’uko abaturage bamaze gusobanukirwa n’uburenganzira bwabo ariko hakaba n’ibindi biterwa n’uko hari abaturage batemera ku buryo bworoshye ibyemezo by’inzego.
