Umuzamu w’Ikipe y’Igihugu Amavubi, Maxime Wenssens yasezerewe n’ikipe yo mu cyiciro cya kabiri mu Buholandi “Roda JC Kekrade” nyuma yo gutsindwa igeragezwa yari amazemo icyumweru.
Wenssens yari yitezweho kumara ukwezi muri Roda JC Kekrade kugira ngo yerekane ubushobozi bwe gusa iyi kipe yamuhaye igihe gito cyo kwigaragaza aho yahise ifata umwanzuro wo kumusezerera nyuma yo kubona ko atari ku rwego bifuza.
Ikinyamakuru Times Sport kivuga ko Wenssens na mugenzi we Guy Smith bari bari mu igerageza mu ikipe ya Roda JC Kekrade bose basezerewe ku itariki ya 24 Ukuboza 2024, mu gihe iyi kipe yahise itangira gushaka abandi bazamu bashya.
Muri Kamena uyu mwaka, Maxime Wenssens w’imyaka 23 yari yerekanwe mu kipe ya Union Saint Gilloise yo mu cyiciro cya mbere mu Bubiligi, aho yari yarakiniye ikipe y’abato.
Muri shampiyona ya 2023/24 uyu musore yakinnye imikino umunani aho yinjijwe ibitego 13 maze amara imikino ibiri yonyine atinjizwa igitego.
Iki ni igihe cya kabiri muri uyu mwaka uyu mukinnyi atsindwa igeragezwa aho mbere y’uko atsindwa muri iyi kipe yari yatsinzwe irindi geragezwa mu ikipe ya AFC Ajax Amsterdam nayo yo mu Buholandi.
Wenssens ufite se ukomoka mu Bubiligi na nyina w’Umunyarwandakazi yakiniye ikipe y’igihugu Amavubi bwa mbere ku wa 25 Werurwe 2024 mu mukino wa gicuti u Rwanda rwatsinzemo Madagascar ibitego 2-0.
