Umunya-Uganda Joshua Cheptegei, yegukanye umudari wa zahabu kuri uyu wa Gatanu nyuma yo kwitwara neza mu mikino Olempike ikomeje kubera i Tokyo mu gihugu cy’u Buyapani.
Ni nyuma yo kuba uwa mbere mu gusiganwa ku maguru ku ntera ya metero 5,000.
Uyu musore w’imyaka 24 y’amavuko, yitwaye neza muri ririya siganwa nyuma yo gukoresha iminota 12, amasegonda 58 n’ibice 15 ahita yegukana umudari wa Zahabu.
Umunya-Canada Mohammed Ahmed yegukanye umudari wa Silver nyuma yo kuba uwa kabiri akoresheje iminota 12, amasegonda 58 n’ibice 61; mu gihe Umunyamerika, Paul Chelimo yegukanye umudari wa Bronze nyuma yo gukoresha iminota 12, amasegonda 59 n’ibice bitanu.
Joshu Cheptegei yegukanye umudari wa zahabu muri iyi mikino Olempike, nyuma y’uko ku wa Gatanu w’icyunweru gishize yegukanye umudari wa Silver mu gusiganwa ku ntera ya metero 10,000.
Umudari wa zahabu uyu mugabo yegukanye ni uwa kabiri Uganda yegukanye mu mikino Olempike y’i Tokyo, nyuma y’uwo Peruth Chemutai aheruka kwegukana mu basiganwa ku ntera ya metero 3,000.
Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
