Ingabo za Uganda (UPDF) zifatanyije n’iza Repubulika ya Demukarasi ya Congo (FARDC) zafatiye mpiri abandi barwanyi 35 b’umutwe w’iterabwoba wa ADF mu bitero bitatu ziherutse kugaba.
Itangazo ryo kuri uyu wa 18 Ukuboza 2021 ryashyizweho imikono n’abavugizi b’ingabo z’ibihugu byombi, Brig. Gen. Flavia Byekwaso na Maj. Gen. Kasonga Cibangu Léon-Richard rivuga ko zagabye ibi bitero muri Teritwari ya Beni muri Kivu y’Amajyaruguru n’iya Ituri tariki ya 13, iya 14 n’iya 15.
Muri Beni, zifashishije intwaro nini zirasa kure n’indege z’intambara, zarashe ku birindiro bya ADF biri ahitwa Kambi Yajua, Tondoli na Kainama. Muri Ituri, zarashe ku bya Madina 3, Bantonga, Kitumba na Mulangu, ziranabisenya.
Iri tangazo risobanura ko abarwanyi ba ADF uko ari 35 bose bafatiwe mu midugudu ya Njiapanda, Manzobe na Ndimo muri Teritwari ya Irumu mu Ntara ya Ituri.
Abarwanyi bafashwe mpiri bariyongera ku bandi 34 bafashwe nyuma y’igitero gikomeye izi ngabo zagabye tariki ya 30 Ugushyingo 2021 ubwo iyi operasiyo yo guhiga ADF yahawe izina rya ‘Shujaa’ yatangiraga. Ntabwo zitangaza niba hari abapfiriye muri ibi bitero.
