Urukiko Rukuru muri Uganda rwategetse abasirikare n’abapolisi bamaze iminsi bagose urugo rw’umunyapolitiki Robert Kyagulanyi (Bobi Wine) kuruvamo.
Aya makuru yemejwe n’Umuvugizi w’ishyaka NUP (National Unity Platform) Bobi Wine abereye umuyobozi, Joel Ssenyonyi kuri uyu wa 25 Mutarama 2021.
Ssenyonyi ku rubuga rwa Twitter ati: “Amakuru mashya; Urukiko Rukuru rwatanze itegeko risaba Polisi n’abasirikare kuva mu rugo rwa Hon. Kyagulanyi.”
Tariki ya 15 Mutarama 2021 nyuma y’umunsi umwe habaye amatora y’Umukuru w’Igihugu ni bwo Bobi Wine wari umukandida yatangaje ko abasirikare bagose urugo rwe. Icyo gihe yari kumwe n’umugore we, Barbie Itungo n’undi mwana w’amezi 18 y’amavuko wa muramu we.
Kuva ubwo Bobi Wine yavuze ko aba basirikare batabemerera gusohoka muri uru rugo.
