Umukinnyi mu gutwara muri Formula One, Lewis Hamilton, aravugwaho kuba ari mu mubano wihariye n’icyamamare cyo muri Leta Zunze Ubumwe za Amerika, Kim Kardashian, nyuma y’uko bombi bagiriye urugendo rw’ibanga mu cyaro cyo mu Bwongereza.
Nk’uko ikinyamakuru The Sun kibitangaza, Kim Kardashian, w’imyaka 45 usanzwe ari umubyeyi w’abana bane, yageze mu Bwongereza avuye i Los Angeles mu ndege ye bwite ifite agaciro ka miliyoni 100 z’amapawundi, aho bivugwa ko yamaranye ijoro rimwe n’uyu mukinnyi.
Aba bombi bivugwa ko bacumbitse ahantu hihariye hazwi nka Estelle Manor, iherereye mu gace ka Cotswolds, aho icyumba kimwe gishobora kugura amapawundi arenga 1,000 ku ijoro. Amakuru avuga ko bahawe serivisi zidasanzwe zirimo gukoresha spa bonyine, massage y’abakundana ndetse n’ifunguro rya nimugoroba ryateguwe mu cyumba cyihariye.
Abari hafi yabo bavuze ko umutekano wari wakajijwe cyane, aho Kim yari aherekejwe n’abarinzi be babiri, naho Lewis na we akaba yari afite umutekano umuherekeje, ariko bose bakirinda kwivanga mu byabaga biri kubera imbere.
Kim yageze ku kibuga cy’indege cya Oxford ku mugoroba wo ku wa Gatandatu, ahita ajyanwa muri hoteli n’imodoka ebyiri, imwe itwara imitwaro ye myinshi. Nyuma y’isaha imwe gusa, Lewis Hamilton na we yahageze akoresheje kajugujugu avuye i London.
Amakuru avuga ko bombi bagabanye icyumba kimwe mu nyubako nkuru ya hoteli, kandi bakirinda kugaragara cyane imbere y’abandi bashyitsi. Kuri uyu wa mbere mu gitondo, bombi basohokeye rimwe baragenda mu modoka imwe, berekeza ahandi hatatangajwe.
Lewis Hamilton na Kim Kardashian basanzwe baziranye kuva kera, cyane cyane binyuze mu mubano Lewis yari afitanye na Kanye West wahoze ari umugabo wa Kim. Bagiye bagaragara hamwe mu birori bitandukanye by’ibyamamare kuva mu 2014, ariko ntibari barigeze bavugwaho umubano w’urukundo.
Nubwo hari aya makuru yose, nta ruhande na rumwe ruremeza ku mugaragaro ko koko bari mu rukundo, kandi ababavuganira bose ntibaragira icyo batangaza ku mugaragaro.
Kim Kardashian, w’imyaka ishize yatandukanye na Kanye West, aherutse kuvuga ko ari gufata umwanya wo kwiga amategeko no kwiyitaho, ariko ko yiteguye gufungura umutima we mu bijyanye n’urukundo mu gihe kiri imbere.
Ku rundi ruhande, Lewis Hamilton, ubu utwara imodoka za Ferrari muri Formula One, asanzwe azwiho gukundana n’abagore batandukanye b’ibyamamare mu bihe byashize, barimo umuririmbyi Nicole Scherzinger bamaranye imyaka myinshi bari mu rukundo.
