Ku wa Gatanu, abajenerali batatu bagiye mu kiruhuko cy’izabukuru batanze umuburo ko hashobora kuzaba ikindi kigeragezo cyo guhirika ubutegetsi muri Amerika mu 2024 gishobora gucamo ibice igisirikare kandi kigashora igihugu mu ntambara y’abenegihugu itariteguwe.
Uwahoze ari Jenerali Majoro, Paul Eaton, uwahoze ari Burigadiye Jenerali, Steven Anderson, n’uwahoze ari Jenerali Majoro, Antonio Taguba, baranditse bati: “Nk’igihugu kigifite amacakubiri nka mbere, tugomba gufata ingamba zo kwitegura ibibi.”
Mu gihe igihugu cyegereje kwibuka bwa mbere imyivumbagatanyo yo kuri Capitol, abajenerali “barushijeho guhangayikishwa n’ingaruka z’amatora y’umukuru w’igihugu ya 2024 ndetse n’igikuba gishobora gucika mu gisirikare, bikaba byashyira Abanyamerika bose mu kaga gakomeye.”
Bongeyeho bati: “Muri make: Turakonja kugera ku magufa iyo dutekereje ko guhirika ubutegetsi byazagerwaho ubutaha.”
Abajenerali batanga umuburo bavuga ko ubutaha hashobora kuba ibintu biteye ubwoba mu gihe abasirikari bakwishyira hamwe n’abashaka guhirika ubutegetsi.
Bose uko ari batatu bagize bati: “Hatabayeho gukomeza kutabwaho, amahirwe yo gusenyuka kw’igisirikare agaragaza gusenyuka kwa sosiyete cyangwa politiki arashoboka cyane.”
“Umubare uteye impungenge” w’abahoze ari abasirikare ndetse n’abasirikare bakiri mu kazi bagize uruhare mu gitero cyagabwe kuri Capitol. Ubushobozi bwo gusenyuka burundu bw’uruhererekane rw’ubuyobozi (mu gisirikare)… nburashoboka haramutse hagaragaye ubundi bwigomeke.”
Mu “matora atavugwaho rumwe, hamwe no gucikamo ibice ,” bamwe bashobora “gukurikiza amabwiriza yatanzwe n’umuyobozi mukuru ubifitiye ububasha,” mu gihe abandi “imitwe y’abigometse” ishobora “gukurikira uwatsinzwe, nka Trump… mu ntambara y’abenegihugu. ”
“Kutitegura kwa gisirikare nyuma y’amatora yo muri 2020 byari bitangaje kandi biteye impungenge. Umunyamabanga w’agateganyo wa Trump ushinzwe ingabo, Christopher Miller, yabujije nkana igisirikare kurinda Capitol mbere ya tariki 6 Mutarama. ”
Bashimangiye ko ibyo bidakwiye kongera kubaho.
Ku ya 6 Mutarama 2021, agatsiko k’abashyigikiye Perezida Donald Trump bagabye igitero ku Nteko Ishinga Amategeko ya Amerika (Capitol) i Washington, DC, bashaka kuburizamo igikorwa cyo kwemeza bidasubirwaho intsinzi ya Perezida Joe Biden banze kwemera gutsindwa kwa Trump mu matora yo muri 2020.
