Umusenateri wo mu ishyaka ry’Abarepubulikani, Chuck Grassley, ubwo yavugaga ijambo muri Sena, yatangaje ko hari umunyamahanga bivugwa ko yahaye ruswa Perezida Joe Biden n’umuhungu we Hunter Biden kandi hari amajwi y’ibiganiro bagiye bagirana.
Kuri uyu wa Mbere ushize, Grassley yagize ati: “Umunyamahanga bivugwa ko yahaye ruswa Joe na Hunter Biden bivugwa ko afite amajwi yafashwe y’ibiganiro yagiranye nabo…”
Nk’uko Grassley abitangaza ngo umunyamahanga ngo afite amajwi 15 y’ibiganiro yagiranye na Hunter Biden hamwe n’andi majwi abiri yagiranye na Joe Biden icyo gihe wari visi perezida.
Grassley yongeyeho, nk’uko bigaragara mu nyandiko, ko umunyamahanga yabitse aya majwi mu rwego rw’ubwishingizi mu gihe yaramuka ageze “ahantu habi.”
Byongeye kandi, Grassley yavuze ko inyandiko yerekana ko Joe Biden ashobora kuba yaragize uruhare muri ibi akoresha umuhungu we, Hunter Biden.
Komite ya Sena ishinzwe ubugenzuzi iri gukora iperereza ku gisa nka gahunda yateguwe yo gutanga ruswa irimo umunyamahanga nk’uko iyi nkuru dukesha urubuga rwa Sena ya Amerika ivuga.
Iperereza rishingiye ku makuru yahawe FBI n’umuntu w’ibanga uvuga ko Biden n’umuhungu we, Hunter Biden, bakiriye miliyoni 10 z’amadolari avuye muri sosiyete ikora ibijyanye no gutunganya ingufu yitwa Burisma yo muri Ukraine kugira ngo bafashe kurangiza iperereza muri iki kigo.
Biden yateye utwatsi ibyo birego.
Mbere gato kuri uyu wa Mbere ushize, itariki 12 Kamena, uwahoze ari Perezida Donald Trump yavuze ko azashyiraho umushinjacyaha wihariye kugira ngo akore iperereza ku biro bya Joe Biden, umuryango we ndetse n’abandi bivugwa ko bagize uruhare muri ruswa igira ingaruka mbi kuri Amerika.
Ku wa Gatanu, inyandiko y’ibirego ishinja Trump ibyaha 37 birimo kubika nkana amakuru y’umutekano w’igihugu yashyizwe ku mugaragaro.
Inyandiko y’ibirego ije mu gihe Trump ayoboye itsinda ry’abakandida b’Abarepubulikani ku mwanya wa perezida wa Repubulika mu matora yo mu 2024.
Trump ahakana ibyo aregwa kandi yanenze Minisiteri y’Ubutabera ya Amerika kuba idakora iperereza ku bikorwa by’ubugizi bwa nabi byakozwe na Biden akoresheje uburyo nk’ubwo.
