Utavugarumwe na Leta yo muri Tuniziya ufungiwe muri gereza yajyanywe mu bitaro nyuma yo kubura imbaraga kubera kwishora mu myigaragambyo yo kwanga ibiryo.
Umuryango wa Jawhar Ben Mbarek watangaje ko yajyanywe mu bitaro kubera kugira umwuma ukabije, ubwo ubuzima bwe bwakomezaga kuba bubi nyuma y’iminsi irenga ibiri mu myigaragambyo yo kwanga kurya.
Ben Mbarek, umwe mu bashinze impuzamashyaka atavugarumwe na Leta, National Salvation Front, yatangiye kwanga kurya ku ya 29 Ukwakira kugira ngo arwanye gufungwa kwe kuva muri Gashyantare 2023.
Mu butumwa bwanyujijwe kuri Facebook kuwa Gatanu, mushiki we Dalila Ben Mbarek Msaddek yavuze ko ubuzima bwa musaza we “bwahungabanye cyane”
Msaddek yavuze ko Ben Mbarek yakiriye imiti ariko “akanga kongererwa intungamubiri” mu bitaro, kuko akomeje kwanga kurya.
Nyuma yo kuvurwa, ku wa Gatanu nimugoroba yasubijwe muri gereza.
Kuwa Gatatu, umunyamategeko we Hanen Khmiri, yavuze ko Ben Mbarek “yakorewe iyicarubozo” n’abacungagereza ba Belli afungiyemo, bageragezaga kumuhatira kurya ku gahato.
Khmiri yavuze ati: “Baramukubise cyane, twabonye imikandara n’ibikomere ku mubiri we.” Yongeyeho ko yatanze ikirego mu bushinjacyaha, bukavuga ko bugiye gukora iperereza.
Yakomeje avuga ko Ben Mbarek yamubwiye ko “abacungagereza bane bamukubitiye ahantu hatari kamera.”
Ben Mbarek ni umwe mu batavuga rumwe n’ubutegetsi bwa Perezida Kais Saied, uri ku butegetsi kuva mu 2019.
Muri Mata, yakatiwe imyaka 18 y’igifungo ku byaha byo “kugambirira guhungabanya umutekano w’igihugu” no “kwifatanya n’itsinda ry’iterabwoba” ibintu amashyirahamwe y’uburenganzira bwa muntu yise politiki yo gucecekesha abatavuga rumwe na leta.
