U Burundi kuri uyu wa Mbere tariki ya 23 Gashyantare, bwongeye gufungura umupaka wa Gatumba-Kavimvira, nyuma y’amezi abiri bwarawufunze.
Leta y’u Burundi yari yarafunze uyu mupaka mu Ukuboza 2025, nyuma y’uko inyeshyamba zo mu mutwe wa AFC/M23 zari zimaze kwigarurira umujyi wa Uvira wa kabiri mu ntara ya Kivu y’Amajyepfo.
Umuyobozi wa serivisi z’abinjira n’abasohoka muri Kavimvira (RDC), nyuma y’ibiganiro yagiranye n’Umuyobozi Mukuru w’Urwego rushinzwe abinjira n’abasohoka mu Burundi, Maurice Mbonimpa, yibukije ko “ibisabwa bisanzwe mu byerekeye abinjira n’abasohoka bigomba kubahirizwa nk’uko bisanzwe (visa n’ibindi byangombwa bikenewe)”.
Yavuze kandi ko umupaka uzajya ufungurwa buri munsi kuva saa mbili za mu gitondo (08h00) kugeza saa kumi n’imwe z’umugoroba (17h00).
Itangazo ry’urwego rw’abinjira n’abasohoka kandi rivuga ko “abari mu Burundi bashobora kwambuka umupaka uyu munsi batuje kandi nta nkomyi.”
U Burundi bwari bwafunze umupaka wa Gatumba ku wa 10 Ukuboza, nyuma y’ifatwa rya Uvira.
Kongera kuwufungura byihuse byatangajwe ku cyumweru n’Umuyobozi w’Intara ya Kivu y’Amajyepfo, Jean-Jacques Purusi Sadiki, ubwo yari mu mujyi wa Uvira.
